"Un Recreo" Especial para UN PASO MÁIS
Hai xente que vén cun gran de area e acaba montando a praia enteira. Pasou máis dunha vez e sempre nos colle por sorpresa, porque nunca deixaremos de asombrarnos coa xenerosidade desinteresada. Un deses casos é, sen dúbida, Ángeles de O Recreo Animación. Outra vez máis, sen pedir nada a cambio, deixáronnos o seu local para que os nenos e as familias de Un Paso Máis puidesen gozar destas vacacións de Entroido nun espazo pensado para eles, un refuxio de xogos e risas cada mañá.
E que pracer dá ver aos cativos nun lugar así, seguro, acolledor, feito á súa medida! A súa ledicia era a mellor proba de que aquel local, durante uns días, converteuse nun pequeno paraíso. Porque os nenos non precisan grandes cousas, só un espazo onde dar renda solta á súa imaxinación e atoparse con outros coma eles, sen présas, sen obrigas, simplemente sendo nenos.
E nós, os pais, tamén tivemos o noso intre. Porque entre xogo e xogo, entre as voces entusiastas dos máis pequenos, atopamos ese tempo compartido que tanto ben nos fai. Iso de parar un pouco, de sentir que non estamos sós, que hai máis xente que entende e acompaña. Que fermoso é cando se lembra que os coidadores tamén necesitan ser coidados!
Así que, unha vez máis, só podemos dicir grazas. Grazas, Ángeles de O Recreo Animación, por facer que un pequeno xesto se transforme nun xigantesco agasallo. Por axudar a que as familias de Un Paso Máis teñan un lugar onde crecer xuntas. E por demostrarnos que, ás veces, a solidariedade é tan natural como o xogo dun neno.
NOTICIAS